Ka’abe Key Badrud Duja Tum Pe Karodon Durood,
Taibah Key Shamsudduha Tum Pe Karodon Durood.
Shaa'fae Roz-E-Jazaa Karodon Durood,
Daa'fae JumlahBalaa Tum Pe Karodon Durood.
Jaan-O-Dil-E-Asfiya Tum Pe Karodon Durood,
Aab-O-Gil-E-Ambiya Tum Pe Karodon Durood.
Toor Pe Jo Sham’a Thaa Chaand Thaa Saa’eer Kaa,
Nayyar-E-Faaraa(n) Huwa Tum Pe Karodon Durood.
Dil Karo Thanda Mera Woh Kaf-E-Paa Chaand Saa,
Seeney Pe Rakh Do Zaraa Tum Pe Karodon Durood.
Zaat Hui Intikhaab Wasf Huwe Laajawaab,
Naam Huwa Mustafa Tum Pe Karodon Durood.
Ghaayat-O-’Illat Sabab Bahr-E-Jahaa(n) Tum Ho Sab,
Tum Sey Banaa Tum Binaa Tum Pe Karodon Durood.
Tum Sey Jahaa(n) Ki Hayaat Tum Sey Jahaa(n) Kaa Sabaat,
Asl Sey Hay Zil Bandhaa Tum Pe Karodon Durood.
Maghz Ho Tum Aur Post Aur Hain Baahir Key Dost,
Tum Ho Daroon-E-Saraa Tum Pe Karodon Durood.
Kya Hain Jo Be-Had Hain Laus Tum Toh Ho Ghais Aur Ghaus,
Cheentte Mein Hoga Bhalaa Tum Pe Karodon Durood.
Tum Ho Hafeez-O-Mughees Kya Hay Woh Dushman Khabees,
Tum Ho Toh Phir Khauf Kya Tum Pe Karodon Durood.
Woh Shab-E-Me’raj Raaj Woh Saf-E-Mehshar Ka Taaj,
Koi Bhi Aisaa Huwa Tum Pe Karodon Durood.
Nuhta Falaahal Falaah Ruhta Faraahal-Maraah,
‘Ud Liya’udal-Hanaa Tum Pe Karodon Durood.
Jaan-O-Jahaan-E-Maseeh Daad Keh Dil Hay Jareeh,
Nabzei(n) Chattin Dam Chalaa Tum Pe Karodon Durood.
Uf Woh Rah-E-Sanglaakh Aah Yeh Paa Shaakh Shaakh,
Aay Mere Mushkil Kusha Tum Pe Karodon Durood.
Tum Sey Khulaa Baab-E-Jood Tum Sey Hay Sab Kaa Wujood,
Tum Sey Hay Sab Ki Baqaa Tum Pe Karodon Durood.
Khastah Hoon Aur Tum Ma’aaz Basta Hoon Aur Tum Malaaz,
Aage Jo Shah Ki RAZA Tum Pe Karodon Durood.
Garche Hain Behad Kusoor Tum Ho ‘Afuw-O-Ghafoor,
Bakhsh Do Jurm-O-Khataa Tum Pe Karodon Durood.
Mehr-E-Khuda Noor Noor Dil Hay Siyah Din Hay Door,
Shab Mein Karo Chaandnaa Tum Pe Karodon Durood.
Tum Ho Shaheed-O-Baseer Aur Main Gunah Par Dileer,
Khol Do Chashm-E-Hayaa Tum Pe Karodon Durood.
Aas Hay Koi Nah Paas Ek Tumhari Hay Aas,
Bas Hay Yahi Aasraa Tum Pe Karodon Durood
Cheent Tumhaari Sahar Chhoot Tumhari Qamar,
Dil Mein Racha Do Ziya Tum Pe Karodon Durood.
Tum Sey Khuda Ka Zuhoor Uss Sey Tumhaara Zuhoor,
Lim Hay Yeh Woh In Huwa Tum Pe Karodon Durood.
Be-Hunar-O-Be-Tameez Kis Ko Huwe Hain ‘Azeez,
Eik Tumhaare Siwaa Tum Pe Karodon Durood..
Taa-Ram-E-Aa’la Ka Arsh Jis Kaf-E-Paa Kaa Hay Farsh,
Aankhon Pe Rakh Do Zaraa Tum Pe Karodon Durood.
Kehne Ko Hain ‘Aam-O-Khaas Eik Tumhi(n) Ho Khalaas,
Band Sey Kar Do Rihaa Tum Pe Karodon Durood.
Tum Ho Shifaa-E-Maraz Khalq-E-Khuda Khud Gharaz,
Khalq Ki Haajat Bhi Kyaa Tum Pe Karodon Durood.
Be-Adab-O-Bad-Lihaaz Kar Nah Sakaa Kuch Hifaaz,
‘Afw Pe Bhoola Raha Tum Pe Karodon Durood.
Law-Teh-E-Daaman Keh Sham’a Jhonkon Mein Hay Roz-E-Jam’a,
Aandhiyon Sey Hashr Utthaa Tum Pe Karodon Durood.
Seena Keh Hay Daagh Daagh Keh Do Kare Baagh Baagh,
Taibah Sey Aa Kar Sabaa Tum Pe Karodon Durood.
Aah Woh Raah-E-Siraat Bandon Ki Kitni Bisaat,
Al Madad Aay Rehnumaa Tum Pe Karodon Durood.
Nawbat-E-Dar Hain Falak Khaadim-E-Dar Hain Malak,
Tum Ho Jahaan Baadshaa Tum Pe Karodon Durood.
Khilq Tumhaari Jameel Khulq Tumhaara Jaleel,
Khalq Tumhaari Gadaa Tum Pe Karodon Durood.
Taibah Key Maah-E-Tamaam Jumlah Rusul Key Imaam,
Naw Shah-E-Milk-E-Khuda Tum Pe Karodon Durood.
Tum Sey Jahaan Ka Nizaam Tum Pe Karoron Salaam,
Tum Pe Karodon Sanaa Tum Pe Karodon Durood.
Tum Ho Jawaad-O-Kareem Tum Ho Rauf-O-Raheem,
Bheek Ho Daata ‘Ataa Tum Pe Karodon Durood.
Khalq Key Haakim Ho Tum Rizq Key Qaasim Ho Tum,
Tum Sey Milaa Jo Milaa Tum Pe Karodon Durood.
Naafe’-O-Daafe’ Ho Tum Shaafe’-O-Raafe’ Ho Tum,
Tum Sey Bas Afzoo(n) Khuda Tum Pe Karodon Durood.
Shaafi-O-Naafi Ho Tum Kaafi-O-Waafi Ho Tum,
Dard Ko Kardo Dawaa Tum Pe Karodon Durood.
Jaayein Nah Jab Tak Ghulaam Khuld Hay Sab Par Haraam,
Milk Toh Hay Aap Ka Tum Pe Karodon Durood
Barse Karam Ki Bharan Phoolein Ni’am Key Chaman,
Aisi Chaalaa Do Hawaa Tum Pe Karodon Durood.
Ik Taraf Adaa-E-Dee(n) Eik Taraf Haasidee(n),
Bandah Hay Tanhaa Shahaa Tum Pe Karodon Durood.
Kyoon Kahoon Be-Kas Hoon Main Kyoon Kahoon Be-Bas Hoon Main,
Tum Ho Mein Tum Par Fidaa Tum Pe Karodon Durood.
Gandey Nikammey Kameen Mehnge Ho(n) Koree Key Teen,
Kaun Humein Paalta Tum Pe Karodon Durood.
Baat Na Dar Key Kahi(n) Ghaat Nah Ghar Key Kahi(n),
Aise Tumhei(n) Paalna Tum Pe Karodon Durood.
Aiso(n) Ko Ne’mat Khilaao Doodh Key Sharbat Pilaao,
Aiso(n) Ko Aisi Ghizaa Tum Pe Karodon Durood.
Girne Ko Hoon Rok Lo Ghotah Lage Haath Do,
Aiso(n) Par Aisi ‘Ataa Tum Pe Karodon Durood.
Apne Khataawaaron Ko Apne Hi Daaman Mein Lo,
Kaun Kare Yeh Bhalaa Tum Pe Karodon Durood.
Kar Key Tumhaare Gunaah Maangein Tumhaari Panaah,
Tum Kaho Daaman Mein Aa Tum Pe Karodon Durood,
Hum Ne Khataa Mein Nah Ki Tum Ne Ataa Mein Nah Ki,
Koi Kami Sarwaraa Tum Pe Karodon Durood.
Aur Koi Ghaib Kya Tum Sey Nihaa(n) Ho Bhala,
Jab Naa Khuda Hi Chupaa Tum Pe Karodon Durood.
Kaam Ghazab Key Kiye Us Peh Hay Sarkaar Sey,
Bandon Ko Chashm E Raza Tum Pe Karodon Durood.
Aankh Ataa Kijiye Us Mey Ziya Dijiye,
Jalwah Qareeb Aa Gaya Tum Pe Karodon Durood.
Kaam Woh Ley Lijiye Tum Ko Jo Raazi Kare,
Theek Ho Naam E Raza Tum Pe Karodon Durood
Contact us
*Gmail: harametaiba@gmail.com
